Վանաձորում համարյա արտակարգ դրություն

(Աղբյուրը՝ «168 ժամ»

Հեղինակ՝ Արմինե Ավետյան)


Վանաձորում Լոռու մարզի դատախազ Ալբերտ Ղազարյանի սպանության թեմայով շրջանառվող վարկածներն առաջնահերթության տեսակետից իրենց տեղերը զիջել են միմյանց:

Եթե մինչեւ հուղարկավորության օրը վանաձորցիները դատախազի սպանությունը կապում էին Լոռու նախկին մարզպետ Հենրիկ Քոչինյանի եւ Վանաձորի քաղաքապետ Սամվել Դարբինյանի հետ, ապա հիմա դա պակաս հավանական են համարում: Հիշեցնենք, որ Լոռու մարզի դատախազությունում է գտնվում Վանաձորի կեղտաջրերի մաքրման կայանում տեղի ունեցած առանձնապես խոշոր չափերի հասնող գողությունների փաստի առիթով հարուցված քրեական գործը: Դատախազությունը ստուգումների արդյունքում պարզել էր, որ գողությունը կատարվել է Հենրիկ Քոչինյանի թույլտվությամբ, եւ գողացված թանկարժեք սարքավորումներն ու խողովակաշարը գտնվում են Սամվել Դարբինյանի եղբայր Սեյրան Դարբինյանին պատկանող «Արգիշտի» ՍՊԸ-ում: Սպանությունից անմիջապես հետո շրջանառության մեջ դրվեց այն տեսակետը, թե սպանության հավանական պատվիրատուները Հ. Քոչինյանը եւ Ս. Դարբինյանն են: Այսինքն՝ Ա. Ղազարյանը ցանկացել է բացահայտել նրանց կատարած հանցագործությունը եւ վերջիններիս պատասխանատվության ենթարկել: Սակայն հիմա այս վարկածը պակաս հավանական է թվում՝ Վանաձորում լավ հայտնի էր, որ Ղազարյանի, Քոչինյանի ու Դարբինյանի հարաբերությունները լարված էին: Այս պայմաններում պարզ էր, որ սպանություն կազմակերպելու համար առաջին հերթին կասկածի տակ էին ընկնելու այս երկուսը: Այս վարկածը պարզունակ է համարվում, որովհետեւ Քոչինյանը եւ Դարբինյանը կգիտակցեին, որ նման դաժան քայլի դիմելու դեպքում առաջին հերթին հենց իրենք կասկածի տակ կընկնեին: Մյուս կողմից, Դատախազությանը մոտ կանգնած մեր աղբյուրները տեղեկացնում են, որ անցած տարիների ընթացքում ՀՀ Գլխավոր դատախազությունը Քոչինյանի եւ Դարբինյանի դեմ հարյուրավոր բողոքներ է ստացել շարքային քաղաքացիներից եւ պաշտոնյաներից: Գլխավոր դատախազությունն այդ բողոքներից ազատվելու համար դրանք ուղարկել է Լոռու մարզի դատախազություն: Ա. Ղազարյանն էլ որոշել է այդ գործերին ընթացք տալ, բայց իշխանության վերին օղակներից հանձնարարել են դադարեցնել գործընթացը: Մեր տեղեկություններով՝ դատախազը հրաժարվել է՝ ասելով, թե հնարավոր չէ այդ ամենը պարտակել: Ասում են, իրավապահ մարմինները հարցաքննել են Ղազարյանի հետ կապ ունեցած բոլոր պաշտոնյաներին: Հ. Քոչինյանը, սակայն, ասաց, որ իրեն հարցաքննության չեն հրավիրել: Վանաձորցիներին այս հանգամանքը զարմանալի է թվում, հատկապես, երբ քաղաքապետ Սամվել Դարբինյանին հարցաքննել են: Մեր աղբյուրներն ասում են, թե Քոչինյանը հիմա թեպետ պաշտոն չունի, սակայն դեռ համարվում է «իշխանությունների մարդը»: Նա խոստացել է նախագահական ընտրությունների ժամանակ գյուղապետերի շրջանում օգտագործել իր նախկին լծակները եւ աշխատել իշխանությունների վերարտադրման օգտին:

Սակայն Քոչինյանի եւ Դարբինյանի հետ կապված առաջին կասկածները կարծես թե հանդարտվում են, եւ հիմա Վանաձորում Ղազարյանի սպանությունն ավելի շուտ հակված են կապել «փայտի գործի» հետ: Մամուլում բազմաթիվ հրապարակումներ են եղել, թե մի քանի գեներալներ տարիներ շարունակ ակտիվորեն զբաղված են փայտի բիզնեսով: Իսկ Ղազարյանը որոշել է ընթացք տալ նաեւ Լոռու մարզի ապօրինի ծառահատումների մասով խոշոր ու «արտոնյալ» գործերին: Ըստ մեր աղբյուրների` այդ առումով հիմա շրջանառվում են գեներալներ Լեւոն Երանոսյանի, Մանվել Գրիգորյանի եւ Արշալույս Փայտյանի անունները: Մենք փորձեցինք «Հայանտառ» ընկերությունից ճշտել, թե վերջին տարիներին եւ հատկապես Ա .Ղազարյանի պաշտոնավարման ժամանակ ապօրինի ծառահատումների ի՞նչ դեպքեր են հայտնաբերվել եւ ի՞նչ գործեր կան հարուցված, եւ արդյոք ընկերությունն ակտիվ համագործակցե՞լ է Լոռու մարզի դատախազության հետ:

«Այո, համագործակցել ենք եւ լավ արդյունք ունենք»,- պատասխանեց «Հայանտառի» տնօրեն Մարտուն Մաթեւոսյանը:

Հետո պարոն Մաթեւոսյանը թվարկեց, թե ինչ դեպքեր կան՝ Օձունի անտառների հրդեհը, Ջիլզայի, Դսեղի, Այրումի գործերը, որոնք շատ խոշոր չափեր չունեն: Այս նույն անունները տվեց նաեւ Ոստիկանության Լոռու մարզի Քննչական վարչության պետ Գագիկ Իսրայելյանը՝ հերքելով, թե ապօրինի խոշոր ծառահատումների հետ կապված քրեական գործեր եղել են: Իսկ պարոն Մաթեւոսյանն ընդհանրապես անհեթեթություն համարեց, թե հայ գեներալները փայտի գործ են անում: «Մենք պարզապես մեր աշխատանքի ընթացքում մարզի իրավապահ կառույցների հետ միասին կարողացել ենք փակել փայտամշակման արտադրամասեր, սղոցարաններ, որոնք օգտագործում էին ապօրինի հատված ծառեր,- ասաց պարոն Մաթեւոսյանը: -Սակայն ապօրինի խոշոր ծառահատումներ չեն եղել»:

ՀՀ Գլխավոր դատախազությունն էլ Լոռու մարզում գտնվող քրեական գործերից տեղեկատվություն ընդհանրապես չի տալիս՝ պատճառաբանելով, թե այս ընթացքում դրանք կարող են խոչընդոտել Ղազարյանի սպանության գործի նախաքննությանը:

Իսկ Վանաձորում հիմա ինչ-որ իմաստով արտակարգ իրավիճակ է: Մեր աղբյուրները տեղեկացնում են, որ իրավապահ մարմինները բռնում են բոլոր այն տղամարդկանց, ովքեր շիկահեր են եւ ունեն սլավոնական արտաքին: Ալբերտ Ղազարյանը հասցրել է ասել, որ իր վրա կրակողը եղել է շիկահեր: Ասում են, թե ոստիկանները շրջում են փողոցներով, մտնում հասարակական բոլոր տիպի օբյեկտներ՝ ռեստորաններ, սաունաներ, խանութներ, եւ շիկահեր տղամարդ տեսնելիս՝ բռնում են:

Իհարկե, սրանք դեռեւս միայն վարկածներ են: Եվ վարկածներից մեկն էլ այն է, որ Լոռու մարզի դատախազ Ալբերտ Ղազարյանն իր մասնագիտական գործունեության մեջ առանձնապես աչքի չի ընկել իր օբյեկտիվությամբ, եւ շատ հնարավոր է` պատճառը վրեժխնդրությունը լինի:

Advertisements
  1. Leave a comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: